ଵିଗତ ପାଞ୍ଚଶହ ଵର୍ଷ ମଧ୍ଯରେ ଭାରତ ଦେଶରେ ଶତାଧିକ ଵୈଦେଶିକ ପାଦପ ଆଣି ଲଗାଯାଇଛି। ତନ୍ମଧ୍ୟରୁ କିଛି ଗଛ ଵିଷୟରେ ଆଜି ଜାଣିଵା ...
କୃଷ୍ଣଚୂଡ଼ା ଗଛଟି ଭାରତରେ ଗାଆଁ ନଗର ଚାରିଆଡ଼େ ଦେଖାଯାଏ । ତେବେ ଅନେକେ ଭାରତୀୟ ଜାଣିନଥିବେ ଯେ ଏହା ପ୍ରକୃତରେ ଏକ ଵୈଦେଶିକ ଗଛ ଏଵଂ ମୂଳତଃ ମାଡାଗାସ୍କର ଦ୍ଵୀପର ପାଦପ ।
କୃଷ୍ଣଚୂଡ଼ା ଗଛର ଵୈଜ୍ଞାନିକ ନାମ
Delonix regia ଏଵଂ Delonix ବଂଶର ଗଛ ସାଧାରଣତଃ ମାଡାଗାସ୍କର ଓ ପୂର୍ଵ ଆଫ୍ରିକା ମୂଳର ଗଛ । କୃଷ୍ଣଚୂଡ଼ା Fabaceae କୁଳ ଅନ୍ତର୍ଗତ Caesalpinioideae ଉପକୁଳର Delonix ବଂଶର ଏକ ଗଛ ଅଟଇ । Delonix ବଂଶରେ ଦଶରୁ ଅଧିକ ଜାତିର ଗଛ ଅଛି ଏଵଂ ଏହି ବଂଶର ସମସ୍ତ ଜାତିର ଗଛ ମାଡାଗାସ୍କର ଓ ପୂର୍ଵ ଆଫ୍ରିକା ମୂଳର ଗଛ ଅଟନ୍ତି ।
ପୁଟୁସ,ପୁଟିସ,ନାଗୁଆରୀ,ଭୂତିଆରୀ,ଡାହାଣୀମାରୀ,ନାଗଅଇରି,କଣ୍ଟାଗନ୍ଧଗଉରା,ଫୁଲଫୁଟି,ନାଗମାରୀକଣ୍ଟା,ନାଗେରୀ,ପାରାଫୁଲ ଓ ଖୁଦୁକୋଳୀ ଇତ୍ୟାଦି ନାମରେ ଜଣାଶୁଣା Lantana camara ମୂଳତଃ ଆମେରକୀୟ ନାତିଶିତୋଷ୍ଣ ଅଞ୍ଚଳର ଗଛ ଏଵଂ ପନ୍ଦରଶହ ଶତାବ୍ଦୀରୁ ଏଯାଵତ୍ ପ୍ରାୟତଃ ୫୦ରୁ ଅଧିକ ଦେଶରେ ଵ୍ୟାପିଅଛି । ପିଲାମାନେ ଏହାର କଂଚା ଫଳ ଓ ତାଳ ପତ୍ର ଖଣ୍ଡିଏ କିମ୍ବା ଲିଚୁ ପତ୍ର ମିଶାଇ ଚୋବାଇ ପାଟି ନାଲି କରନ୍ତି । ଏହାର ଶୁଖିଲା ପତ୍ରକୁ ମାଟିରେ ମିଶାଇଲେ ଅତି ଉତ୍କୃଷ୍ଟ ମାନର humus ହୁଏ, ମାଟିର ଉର୍ଵରତା ବଢ଼ାଏ । ଏହାର କାଠିକୁ ଦାନ୍ତକାଠି କରାଯାଏ । ଏହି ଗଛ ଶୁଖି ଗଲେ ବାଡି ବଗିଚାରେ ବାଡ ଦିଆଯାଏ ଏଵଂ ଜାଳେଣି ବି ହୁଏ । ତେବେ ଏ ଗଛ ଯେଉଁଠି ହୁଏ ସେଠାରେ ଅନ୍ୟ ଗଛକୁ ବଢ଼ିଵାକୁ ଦିଏ ନାହିଁ । କେହି କେହି ଏହାକୁ ଅଲାଜୁକି ଗଛ ବି କୁହନ୍ତି କାରଣ ଯେତେ ହାଣିଲେ ,ଓପାଡ଼ିଲେ ବି ଯଦି ଏହାର କୌଣସି ଅଂଶ ଭୂମିରେ ରହିଯାଏ ତହିଁରୁ ପୁଣି ଗଛ ହୋଇଥାଏ ।
Pineapple ଓ ସପୁରୀପଣସ ଭାବରେ ଜଣାଶୁଣା Ananas comosus ମୂଳତଃ ଦକ୍ଷିଣ ଆମେରିକା ମହାଦେଶର ଗଛ । ଏହା ସପ୍ତଦଶ ଶତାବ୍ଦୀରୁ କ୍ରମେ ସାରା ଵିଶ୍ଵରେ ଚାଷ କରାଯାଉଛି । ଏହା Bromeliaceae କୁଳର ଗଛ ଏଵଂ ଏହି କୁଳରେ ୮୦ଟି ବଂଶ ଓ ୩୭୦୦ରୁ ଅଧିକ ଜାତିର ଗଛ ରହିଛି । Pine cone ଭଳି ଦେଖାଯାଏ ବୋଲି ୟୁରୋପ ଓ ଆମେରିକାରେ ଏହାର ନାମ Pineapple ରଖାଯାଇଥିଲା । ଏହାର ଅନ୍ୟତମ ନାମ Annanasଟି Tupi ଆମେରକୀୟ ଜନଜାତୀୟ ଭାଷାର nanas ଶବ୍ଦରୁ ଗୃହୀତ ହୋଇଛି । ପୂର୍ଣ୍ଣଚନ୍ଦ୍ର ଭାଷାକୋଷ ଅନୁସାରେ ଏହାର ସପୁରୀ ନାମ ଵୈଦେଶିକ ଶବ୍ଦ ସଫର୍ ଓ ସଫୁରୀ ସହିତ ସମ୍ବନ୍ଧିତ । ସଫର୍ ଶବ୍ଦର ଗୋଟିଏ ଅର୍ଥ ଯାତ୍ରା ସେହିପରି ସଫରୀର ଅର୍ଥ ଵିଦେଶାଗତ ।
ପିଜୁଳି, अमरूद ଓ Guava ନାମରେ ଜଣାଶୁଣା Psidium ଜାତୀୟ ଗଛ ଵିଶେଷତଃ Psidium guajava ଭାରତରେ ପଞ୍ଚଦଶ ଶତାବ୍ଦୀ ପରେ ଆସି ପହଞ୍ଚିଲା ପରେ ସାରା ଭାରତରେ ଵ୍ୟାପିଯାଇଛି । ପିଜୁଳି,ବିଜୁଳି,ଜାମ୍ବ,ଜାମି,ଜାମ୍,ମେଗୁଆ,ମେଘୁଆ,ପେଡା,ପିଆରା,ଚାଉଳିଆ,ପେହେଡ଼ା,ମାଯା,ମାୟା,ତାମରସ,ଟମସ,ଟମରସ,ସଇତମ୍ବା,ଜାମ୍ବୀ,ଲେଭୁଆ,ଡାରାଛ,ସଇତମ୍ବା,ବିଦୁର,ବିଦୁଡ଼ି,ବିହି,ମହୁଆ,ପେଢ଼ା,ଲେହୁଆ ଓ ଝିଲିକା ଇତ୍ୟାଦି ଓଡ଼ିଶାରେ ଏହାର ପଚାଶରୁ ଅଧିକ ନାମ ରହିଛି । ଏହା ମୂଳତଃ ଦକ୍ଷିଣ ଓ ଉତ୍ତର ଆମେରିକା ମହାଦେଶର ଗଛ କିନ୍ତୁ ନିଜର ଉତ୍କୃଷ୍ଟ ସ୍ଵାଦ ଯୋଗୁଁ ସାରା ଵିଶ୍ଵରେ ଆଦର ଲାଭ କରିଛି ।
ବିଲାତି ଆଳୁ, ଗୋଲ୍ ଆଳୁ ଵା ଆଳୁ ତଥା Potato ନାମରେ ପରିଚିତ Solanum tuberosum ମୂଳତଃ ଆମେରକୀୟ ପାଦପ ତେବେ ଏହାର ଏକ ପରିଵା ଭାବରେ ସାରା ଵିଶ୍ଵରେ ଲୋକପ୍ରିୟତା ଏହାକୁ ଵିଶ୍ଵଵିଦିତ କରିଛି । ମକା,ଗହମ,ଧାନ ପରେ ଗୋଲ ଆଳୁ ହେଉଛି ମନୁଷ୍ୟମାନଙ୍କ ଦ୍ଵାରା ଭକ୍ଷଣ କରାଯାଉଥିଵା ଚତୁର୍ଥ ସର୍ଵାଧିକ ଖାଦ୍ୟଦ୍ରଵ୍ୟ । ଵର୍ତ୍ତମାନ ପୃଥିଵୀରେ ଏହାର ୫୦୦୦ରୁ ଅଧିକ ଚାଷ କିସମକୁ କୃଷିକ୍ଷେତ୍ରରେ ଚାଷ କରାଯାଉଛି । କ୍ରମାନ୍ଵୟରେ ଚୀନ,ଭାରତ,ୟୁକ୍ରେନ,ଋଷିଆ, ଯୁକ୍ତରାଷ୍ଟ୍ର ଆମେରିକାରେ ଏହାକୁ ସର୍ଵାଧିକ ଚାଷ କରାଯାଏ । ଏହା ପଚଲଘଣ୍ଟା/ପାତଲଘଣ୍ଟା ଵା ବିଲାତି ବାଇଗଣ,ବାଇଗଣ,ଦୁଦୁରା ଜାତୀୟ Solanum ବଂଶର ଗଛ ।
No comments:
Post a Comment