ଶୁଭ ଅଶୁଭ

ଗୋଟିଏ ରାଜନୈତିକ ଦଳର ସଦସ୍ୟଙ୍କର ଜଣେ ସାହିତ୍ୟିକ ବନ୍ଧୁ ଥିଲେ । ଉଭୟ ବନ୍ଧୁ ମଝିରେ ମଝିରେ ରାଜଧାନୀରେ ଭେଟାଭେଟି ହୋଇ ଯାଆନ୍ତି । ଥରେ ଦୁଇ ବନ୍ଧୁ ଚାଆ ଦୋକାନରେ ଚାଆ ପିଇସାରି ବାହରକୁ ବାହାରୁ ଥାଆନ୍ତି ଏତିକିବେଳେ ଗୋଟେ କଳା ବିଲେଇଟେ ସେପଟ ଦେଇକି ଚାଲିଗଲା । ରାଜନୀତିଆ ବନ୍ଧୁ ମୁହଁ ଶୁଖେଇ ଦେଲେ । ତାଙ୍କର ପଦୁଅଁ ଫୁଲ ମିତାନ ମଉଡ଼ା କିମ୍ପାଇଁ ଶୁଖିଗଲା ବୋଲି ସାହିତ୍ୟିକ ପଚାରି ଦେଲେ । ବିରକ୍ତି ପ୍ରକାଶ କରି ରାଜନୀତିଆ ବନ୍ଧୁ କହିଲେ, ଧେତ୍... ବଡ଼ ଜାଟି ଆକ୍କା, ଦେଖୁନା ମଣିଷ ଗାଧୋଇ ପାଧୋଇ ଘରୁ କେତେ କଷ୍ଟରେ ଆସିଥିଲା ଏଇଁଲେ ବାଟ ଘାଟ ମାରା ହେଇଗଲା ! ସେ କଳା ବିଲେଇଗୁଡ଼ା ବଡ଼ ଅଶୁଭ ,ଅଲଖେଣିଆ ଏବେ ଦେଖିଵ କିଛି ନା କିଛି ମନ୍ଦ ଘଟଣା ନିଶ୍ଚୟ ଘଟିଵ । 

ସତକୁ ସତ ତା ପରଦିନ ଦେଶରେ ଗୋଟେ ବଡ଼ ଧରଣର ରେଳ ଦୁର୍ଘଟଣା ହୋଇଗଲା । କିଛି ଦିନ ପରେ ସାହିତ୍ୟିକ ଓ ରାଜନୈତିକ ବନ୍ଧୁ ପୁଣି ଚାଆ ଦୋକାନରେ କଥା ହେଉଥାନ୍ତି । 

ସାହିତ୍ୟିକ କହିଲେ— ବୁଝିଲ ବନ୍ଧୁ ତୁମେ ଠିକ୍ କହୁଥିଲ ଶୁଭ ଅଶୁଭ ବୋଲି ନିଶ୍ଚେ କିଛି ଗୋଟାଏ ଅଛି ! ଦେଖୁନା ସେଦିନ କଳା ବିଲେଇଟିଏ ତୁମ ବାଟ କାଟି ଚାଲିଗଲା ବୋଲି ତା ପରଦିନ କେଡ଼େ ବଡ଼ ଦୁର୍ଘଟଣାଟେ ହୋଇଗଲା । ଚାଆ ଦୋକାନୀ ଗାଉଁଲି ଲୋକ ସେ ସାହିତ୍ୟିକଙ୍କ କଥା କାଟି କହିଲା ନା ମ ସେହି ଅମୁକ ଦଳର ସମୁକ ନେତା ଏ ଦେଶ ପାଇଁ ଅଶୁଭ ! ଦେଖୁନା କୋଡ଼ିଏ ଵର୍ଷ ତଳେ ସେ ଯେତେବେଳେ ଆମ ପ୍ରଦେଶର ମନ୍ତ୍ରୀ ଥିଲେ ଏଠି ଦୁଇ ଵର୍ଷ ଭିତରେ ଚକ୍ରଵାତ, ସୁନାମି ଆଉ ଭୂମିକମ୍ପ ହୋଇଯାଇଥିଲା ଆଉ ଏଥର ଦେଶର ମନ୍ତ୍ରୀ ହେଵାରୁ ଅମୁକେଇ ଦେଶ ସହିତ ଆମ ଦେଶର ଝଗଡ଼ା ହେଉଛି,ଉଡ଼ାଜାହାଜ ଓ ରେଳ ଦୁର୍ଘଟଣା ହେଉଛି ପୁଣି ରୋଗ ଵୈରାଗରେ ଲକ୍ଷ ଲକ୍ଷ ଲୋକ ବି ମରୁଛନ୍ତି...! 

ରାଜନୀତିଆ ବନ୍ଧୁ ଏକଥା ଶୁଣି ସାମାନ୍ୟ ଵିଵ୍ରତ ହୋଇ କହିଲେ... ”ନା ନା ଏ କ୍ଷେତ୍ରରେ ଆମେ ଅମୁକେଇ ନେତାଙ୍କୁ ଅଶୁଭ କହିପାରିଵା ନାହିଁ । କାରଣ ସେ ଆମ ଗଙ୍ଗା ଭଳି ପଵିତ୍ର ଓ ଗାଈ ପରି ସରଳିଆ ସାଧୁ ସଚ୍ଚୋଟ ଦଳର ନେତା । 

ସବୁ ଭୁଲ୍ ସେଇ କଳା ବିଲେଇଟାର ସେ ହିଁ ଅଶୁଭ ଆଉ ତାହାରି ଯୋଗୁଁ ସେ ରେଳ ଦୁର୍ଘଟଣା ଘଟିଥିଲା ...”

...

..

.

(ଏହି ଲେଖାଟି ସହିତ କୌଣସି ରାଜନୈତିକ ଦଳ, ସାମ୍ପ୍ରତିକ ଘଟଣା ସହିତ କିଛି ବି ସମ୍ପର୍କ ନାହିଁ । ଏହା ସମ୍ପୂର୍ଣ୍ଣ କାଳ୍ପନିକ ଏଵଂ କେଵଳ ହାସ୍ୟରସ ଯୁକ୍ତ ଆଲେଖ୍ୟ। ତେଣୁ ପାରିଲେ କେଵଳ ହସନ୍ତୁ, ଉଡ଼ନ୍ତା ତୀର ମନେ କରି ଛାତିରେ ଧରିଲେ ଆପଣଙ୍କ ହିଆ ଵିଦୀର୍ଣ୍ଣ ହେଵ ଆମ୍ଭର ନୁହେଁ 👻🙏)