Hirsutism କାରଣରୁ କିଛି ଝିଅଙ୍କ ମୁହଁରେ ଦାଢ଼ି ଓ ନିଶ ଭଳି କେଶ ଉଠିଥାଏ । ସାଧାରଣତଃ ପୁରୁଷମାନଙ୍କର ମୁଖମଣ୍ଡଳ, ଛାତି ଓ ପିଠି ଭଳି ସ୍ଥାନରେ ଅଧିକ ପରିମାଣରେ କେଶ ବୃଦ୍ଧି ହୁଏ । ଉଲ୍ଲେଖଯୋଗ୍ୟ ଯେ ମହିଳାମାନଙ୍କ କ୍ଷେତ୍ରରେ ନିଶ ଓ ଦାଢ଼ି ଭଳି ଅତିରିକ୍ତ କେଶ ରହିଵା ସ୍ୱାସ୍ଥ୍ୟ ସମସ୍ୟାକୁ ସୂଚିତ କରେ ନାହିଁ, କାରଣ କେତେକ ମହିଳାଙ୍କର ସ୍ୱାଭାଵିକ ଭାଵରେ ଅନ୍ୟମାନଙ୍କ ତୁଳନାରେ ଅଧିକ କେଶ ବୃଦ୍ଧି ହୋଇଥାଏ ।
ମହିଳାଙ୍କ କ୍ଷେତ୍ରରେ Hirsutismର ପ୍ରାଥମିକ କାରଣ ହେଉଛି ଆଣ୍ଡ୍ରୋଜେନ୍ର ମାତ୍ରାରେ ବୃଦ୍ଧି, ଯାହା କି ପୁରୁଷ ଯୌନ ହରମୋନ୍ ଅଟେ । ମହିଳାଙ୍କଠାରେ ଵିଭିନ୍ନ କାରଣରୁ Hirsutism ବୃଦ୍ଧି ହୋଇପାରେ, ଯଥା:
କ. Polycystic ovary syndrome (PCOS) ଵା ପିସିଓଏସ୍ ଏକ ସାଧାରଣ ହରମୋନ୍ ଵ୍ୟାଧି ଯାହା ପ୍ରଜନନ ଵୟସର ମହିଳାମାନଙ୍କୁ ପ୍ରଭାଵିତ କରେ । ଏହା ଦ୍ୱାରା ଆଣ୍ଡ୍ରୋଜେନ ଉତ୍ପାଦନ ବୃଦ୍ଧି ପାଇପାରେ, ଯାହାଫଳରେ Hirsutism ହୋଇଥାଏ ।
ଖ. Genetics ଵା ଆନୁବଂଶିକ କାରଣରୁ କେତେକ ମହିଳାଙ୍କର Hirsutism ବୃଦ୍ଧିର ଆନୁବଂଶିକ ପ୍ରଵୃତ୍ତି ଥାଇପାରେ, ଅର୍ଥାତ୍ ବଂଶାନୁକ୍ରମିକ କାରଣରୁ ସେମାନଙ୍କ ମୁହଁରେ ଅଧିକ କେଶ ଵିକଶିତ ହେଵାର ସମ୍ଭାଵନା ଥାଏ ।
ଗ.କେତେକ ନିର୍ଦ୍ଦିଷ୍ଟ Medications ଔଷଧ ଯେପରିକି ଆନାବୋଲିକ୍ ଷ୍ଟେରଏଡ୍ କିମ୍ବା ହର୍ମୋନ୍ ସମ୍ବନ୍ଧୀୟ ଔଷଧ ଵ୍ୟଵହାର ଯୋଗୁଁ, ପାର୍ଶ୍ୱ ପ୍ରତିକ୍ରିୟା ଘଟି ମହିଳାଙ୍କର Hirsutism ବୃଦ୍ଧି ଘଟିପାରେ ।
ଘ.ହରମୋନ ଅସନ୍ତୁଳନ କାରଣରୁ ମଧ୍ୟ ମହିଳାଙ୍କର ନିଶ ଦାଢ଼ି ଉଠିଥାଏ । ପିସିଓଏସ ସହିତ ଅସମ୍ପୃକ୍ତ ଅନ୍ୟ ଜାତୀୟ ହରମୋନ ଅସନ୍ତୁଳନ, ଯେପରିକି ଆଡ୍ରେନାଲ ଗ୍ରନ୍ଥି ରୋଗ କିମ୍ବା ଥାଇରଏଡ ସମସ୍ୟା ମଧ୍ୟ ମହିଳାମାନଙ୍କର Hirsutism ବୃଦ୍ଧି ଘଟାଇପାରେ ।
ଙ.କେତେକ କ୍ଷେତ୍ରରେ ମହିଳାମାନଙ୍କର ମୁଖ ଓ ଶରୀରର ଅନ୍ୟ ଭାଗରେ ଅତ୍ୟଧିକ କେଶ ବୃଦ୍ଧିର କାରଣ ଅଜ୍ଞାତ ରହିଗଲେ ଵା ଜଣା ନପଡ଼ିଲେ ସେହିପ୍ରକାରର ସମସ୍ୟାକୁ
Idiopathic hirsutism କୁହାଯାଏ ।
କିଛି ଝିଅଙ୍କର ନିଶ ଓ ଦାଢ଼ି ବଢ଼ିଵା ଯୋଗୁଁ ବାହାଘର ହୋଇପାରେ ନାହିଁ । କେତେକ ନିର୍ଦ୍ଦିଷ୍ଟ ଅଞ୍ଚଳର ସମାଜରେ ମଧ୍ୟ ମୁଖମଣ୍ଡଳରେ କେଶ ଉଠୁଥିଵା ଝିଅ ଓ ମହିଳାମାନେ ଅନ୍ୟ ଲୋକଙ୍କ ଦ୍ଵାରା ହାସ୍ୟରୋଳର ଶିକାର ହୁଅନ୍ତି ।
ତେବେ କୌଣସି ମହିଳାଙ୍କ ପାଇଁ ଯଦି ମୁହଁରେ ଅତ୍ୟଧିକ କେଶ ବୃଦ୍ଧି ଏକ ଚିନ୍ତାର ଵିଷୟ ହୋଇପଡ଼େ ତାହେଲେ ସେ ଅଭିଜ୍ଞ ଚିକିତ୍ସକ କିମ୍ବା ଚର୍ମ ରୋଗ ଵିଶେଷଜ୍ଞଙ୍କର ପରାମର୍ଶ ନେଇପାରନ୍ତି । ଏ ସମସ୍ୟାର ସମାଧନ ପାଇଁ ଚିକିତ୍ସକମାନେ ପ୍ରଥମେ ପିଡ଼ିତ ଵ୍ୟକ୍ତିର ସ୍ଵାସ୍ଥ୍ୟ ଇତିହାସର ମୂଲ୍ୟାଙ୍କନ କରନ୍ତି ତାପରେ ଆଵଶ୍ୟକ ସ୍ଵାସ୍ଥ୍ୟ ପରୀକ୍ଷା ଓ ଉପଯୁକ୍ତ ଚିକିତ୍ସା ଵିକଳ୍ପର ପରାମର୍ଶ ଦିଅନ୍ତି । hirsutismର ଚିକିତ୍ସାରେ ହର୍ମୋନ୍ର ସ୍ତର ନିୟନ୍ତ୍ରଣ କରିଵା ପାଇଁ ନିର୍ଦ୍ଦିଷ୍ଟ ଔଷଧ, ଲେଜର କେଶ ଅପସାରଣ, କିମ୍ବା ଅନ୍ୟାନ୍ୟ କେଶ ଅପସାରଣ କୌଶଳ ରହିଛି ।
ଆଧୁନିକ ଯୁଗରେ ଚିକିତ୍ସା କ୍ଷେତ୍ରରେ ପ୍ରଚଳିତ ଵୈଜ୍ଞାନିକ ଶବ୍ଦ Hirsutismର 'ପୁଂଵତରୋମତା' ବୋଲି ଏକ ସର୍ଵଭାରତୀୟ ଵୈଜ୍ଞାନିକ ପ୍ରତିଶବ୍ଦ ସୃଷ୍ଟି କରାଯାଇଛି । ତେବେ ଏ ସମସ୍ୟା ଆଜିର ନୁହେଁ । ବହୁ ପ୍ରାଚୀନ କାଳରୁ ଏହା ଜନସମାଜରେ ରହିଥିଲା । କେତେକ ପ୍ରାଚୀନ ଓଡ଼ିଆ ଓ ସର୍ଵଭାରତୀୟ ଶବ୍ଦ ଏହାର ପ୍ରମାଣ ସ୍ଵରୂପ ପ୍ରଦାନ କରାଯାଇପାରେ । ଓଡ଼ିଶାରେ ସାଧାରଣତଃ ମୁଖମଣ୍ଡଳରେ ନିଶ ଦାଢ଼ି ଉଠୁଥିଵା ଝିଅକୁ ନିଶେଇ କୁହାଯାଏ । ଆଗେ ପୋଟା ଶବ୍ଦ ଏହି ଅର୍ଥରେ ପ୍ରୟୋଗ କରାଯାଉଥିଲା । ପୂର୍ଣ୍ଣଚନ୍ଦ୍ର ଭାଷାକୋଷରେ ଥିଵା ସମାର୍ଥକ ପୋଟା ଶବ୍ଦର ଦୁଇଗୋଟି ଅର୍ଥ ଏଠାରେ ଉଲ୍ଲେଖଯୋଗ୍ୟ । ପ୍ରଥମତଃ ପୁରୁଷଲକ୍ଷଣଯୁକ୍ତା ସ୍ତ୍ରୀ; ପୁଂସଲକ୍ଷଣା ସ୍ତ୍ରୀ ଵା ଯେଉଁ ସ୍ତ୍ରୀର ସ୍ତନ ନ ଥାଇ ଦାଢି ଆଦି ଥାଏତାକୁ ପୋଟା କୁହାଯାଏ ବୋଲି ଭାଷାକୋଷରେ କୁହାଯାଇଛି ।
କୋଟିବ୍ରହ୍ମାଣ୍ଡ ସୁନ୍ଦରୀରେ କଵିସମ୍ରାଟ ଉପେନ୍ଦ୍ର ଭଞ୍ଜ ଏହି ଅର୍ଥରେ ପୋଟା ଶବ୍ଦ ପ୍ରୟୋଗ କରିଛନ୍ତି ବୋଲି ଭାଷାକୋଷରେ ଉଦାହରଣ ଭାବେ ପ୍ରଦତ୍ତ ହୋଇଛି ।
“ସଙ୍ଗତିରେ ଆଗତ ତା ପୋଟା ଗୋଟାଏ ବୀର ସନ୍ନିକଟ ହୋଇ ପ୍ରକଟ ହୁଏ”( ଭଞ୍ଜ, କୋଟିବ୍ରହ୍ମାଣ୍ଡସୁନ୍ଦରୀ।)
ପୁଣି ସ୍ତ୍ରୀଲକ୍ଷଣଯୁକ୍ତ ପୁରୁଷକୁ ମଧ୍ୟ ପୋଟା କୁହାଯାଏ । ଓଡ଼ିଆ ଦେଶଜ ଭାବେ ଯେଉଁ ଵ୍ୟକ୍ତିର ପେଟ ଆଦିର ମାଂସର ପୁଟି ଝୁଲୁ ଥାଏ ତାକୁ ମଧ୍ୟ ପୋଟା କୁହାଯାଏ ।
ଏ ଧରଣର ଆଉ ଏକ ଶବ୍ଦ ହେଉଛି ନରମାନିକା ! ନରଚିହ୍ନଧାରିଣୀ ସ୍ତ୍ରୀ ଵା ଯେଉଁ ସ୍ତ୍ରୀଠାରେ ଶ୍ମଶ୍ରୁ ଆଦି ପୁରୁଷ ଚିହ୍ନ ଲକ୍ଷିତ ହୁଏ ତାକୁ ନରମାନିକା କୁହାଯାଏ ।
ଏ ଧରଣର ଆଉ କୌଣସି ଶବ୍ଦ ଥିଲେ ଜଣାନ୍ତୁ ।
•••••••••••••••••••••••••••
ତଥ୍ୟ ଉତ୍ସ: ପୂର୍ଣ୍ଣଚନ୍ଦ୍ର ଭାଷାକୋଷ ଓ ଅନ୍ତର୍ଜାଲ
(ଶିଶିର ସାହୁ ମନୋଜ— କନ୍ତିଓ ପୁଟସାହି, ଢେଙ୍କାନାଳ)
•••••••••••••••••••••••••••
No comments:
Post a Comment