ବହୁତ ଵର୍ଷ ପୂର୍ଵେ ମାଛମାନେ ସ୍ଥଳଭାଗରେ ଵାସ କରୁଥିଲେ । ମାଛମାନେ ମଣିଷଙ୍କ ପରି ଦୁଇ ଗୋଡ଼ରେ ଚାଲୁଥିଲେ । ସେ ଯୁଗରେ ଗୋଟିଏ ମାଛର ଏକ ଚିତା ସହିତ ବନ୍ଧୁତା ହୋଇଯାଇଥିଲା । ସେମାନେ ପରସ୍ପର ସହିତ ଖେଳୁଥିଲେ ସାଥି ହୋଇ ବୁଲୁଥିଲେ । ଚିତାବାଘର ସ୍ତ୍ରୀ ଅତି ସୁନ୍ଦର , ମାଛ ତା ପ୍ରେମରେ ପଡି଼ଗଲା ।ଯେତେବେଳେ ବି ଚିତାବାଘଟା ଅନୁପସ୍ଥିତ ରହୁଥିଲା, ମାଛଟି ଚିତାବାଘର ସ୍ତ୍ରୀ ତୁଲେ ଯାଇ ମିଶୁଥିଲା । ଦିନେ ଗୋଟିଏ ବୁଢ଼ୀ ଚିତାବାଘୁଣୀ ଏ ରହସ୍ୟ ଜାଣିପାରି ଚିତାବାଘକୁ ଜଣାଇ ଦେଲା । ପ୍ରଥମେ ଚିତାବାଘ ଏହା ଜାଣି ଵିଶ୍ଵାସ କରିନଥିଲା ଯେ ତା ବନ୍ଧୁ ମାଛ ଏମିତି କରୁଥିଵ । କିନ୍ତୁ ଦିନେ ରାତିରେ ସେ ଅପ୍ରତ୍ୟାଶିତ ଭାବରେ ଫେରି ଆସି ମାଛ ଏଵଂ ତା ସ୍ତ୍ରୀକୁ ଏକାଠି ପାଇ ଅତ୍ୟନ୍ତ କ୍ରୋଧିତ ହୋଇଗଲା । ମାଛ ଓ ଚିତା ମଧ୍ୟରେ ଝଗଡ଼ା ହୋଇ ଏହାର ଵିଚାର ରାଜାଙ୍କ ପାଖରେ ପହଞ୍ଚିଲା । ସେତେବେଳେ ଜଣେ ସ୍ଵର୍ଗର ଦେଵତା ମର୍ତ୍ତ୍ୟର ଶାସକ ଥାଆନ୍ତି। ସେ ଉଭୟ ପକ୍ଷର ଯୁକ୍ତି ଶୁଣି, ପ୍ରମାଣ ଦେଖି ଆଦେଶ ଦେଲେ ଯେ ମାଛଟି ନିଜ ବନ୍ଧୁପତ୍ନୀଙ୍କ ସହିତ ଅଵୈଧ ସମ୍ପର୍କ ରଖିଛି ତେଣୁ ସେ ଦୋଷୀ ଏଵଂ ଏଥିପାଇଁ ଆଜିଠାରୁ ମାଛ ପାଣିରେ ଯାଇ ଵାସ କରିଵ । ଯଦି ମାଛ ରାଜ ଆଦେଶ ଅଵଜ୍ଞା କରି ଭୂମିରେ ପାଦ ଦିଏ ତେବେ ସେ ମରିଯିଵ। ରାଜ ଆଦେଶ ପାଇ ମାଛଟି ଦୁଃଖ ମନରେ ପାଣି ଭିତରେ ରହିଵାକୁ ଲାଗିଲା ,ଧିରେ ଧିରେ ତା ଗୋଡ଼ ଦୁଇଟି ଲାଗିଯାଇ ଲାଞ୍ଜରେ ରୂପାନ୍ତରିତ ହୋଇଗଲା । ଏପଟେ ଚିତାବାଘର ମାଛ ପ୍ରତି ରାଗ ଦିନୁଁ ଦିନ ବଢ଼ି ବଢ଼ି ଗଲା । ଚିତାକୁ ତା ସ୍ତ୍ରୀ ଭଲ ପାଉନଥିଲା କାରଣ ସେ ମାଛକୁ ଭୁଲିପାରିନଥିଲା । ତେବେ ଚିତାବାଘ ତା ଛୁଆଙ୍କୁ ତା ଵିଶ୍ଵାସଘାତକ ବନ୍ଧୁ ମାଛକୁ ମାରିଵାକୁ ପଠାଇଲା । ଚିତାବାଘର ଛୁଆମାନେ ମାଛକୁ ଦେଖିଲେ ମାରିଦେବେ ବୋଲି ପ୍ରତିଜ୍ଞା କରି ତାକୁ ଉଣ୍ଡିଵାକୁ ବାହାରିଗଲେ । କ୍ରମେ ସେମାନଙ୍କର ଛୁଆ ଓ ତାଙ୍କ ଛୁଆ ବି ହେଲେ ଏଵଂ ମାଛକୁ ଦେଖିଲେ ମାରି ଦେଵାର ପ୍ରତିଜ୍ଞାଟି ପୁରୁଷାନୁକ୍ରମେ ପରମ୍ପରାରେ ପରିଣତ ହେଲା । ଚିତାର ବଂଶୋଦ୍ଭଵମାନଙ୍କ ମଧ୍ୟରେ କେତେକ ଜଙ୍ଗଲରେ ରହିଗଲେ କିନ୍ତୁ ଆଉ କେତେକ ବଂଶଧର ପ୍ରାଚୀନ କାଳରୁ ଚଳି ଆସୁଥିଵା ପରମ୍ପରାକୁ କଡ଼ାକଡ଼ି ଭାବେ ପାଳନ କରି ଜଳ ଥିଵା ଅଞ୍ଚଳରେ ରହିଵାକୁ ଲାଗିଲେ । ଜଙ୍ଗଲରେ ଯୋଉମାନେ ରହିଗଲେ ସେମାନେ ବାଘ, ସିଂହ ଓ ପେଣ୍ଡ୍ରା ହୋଇଗଲେ ଏଵଂ ଜଳ ଥିଵା ସ୍ଥାନଗୁଡି଼କରେ ରହୁଥିଵା ବଂଶଧରମାନେ ବିଲେଇ ହୋଇଗଲେ । ସେଦିନରୁ ଆଜି ପର୍ଯ୍ୟନ୍ତ ବିଲେଇ ମାଛକୁ ଦେଖିଲେ ତାକୁ ଧରି ଖାଇଵାକୁ ଚେଷ୍ଟା କରନ୍ତି।
•••••••••••••••••••••••••
ଵି:ଦ୍ର—
•ପ୍ରକୃତରେ ବିଲେଇମାନେ ମାଛମାନଙ୍କ ପ୍ରତି ଆକୃଷ୍ଟ ହୁଅନ୍ତି କାରଣ ସେମାନେ ଶିକାରୀ ଜୀଵ,ମାଛର ଗନ୍ଧ ସେମାନଙ୍କୁ ଆକର୍ଷିତ କରିଥାଏ,ମାଛର ସ୍ଵାଦ ସେମାନଙ୍କୁ ଭଲ ଲାଗେ,ମାଛ ସହିତ ଖେଳିଵାକୁ ବିଲେଇମାନେ ଭଲ ପାଆନ୍ତି,ମାଛମାନେ ପାଣିରେ ପହଁରିଵା ଦେଖି ବିଲେଇମାନେ ଆକର୍ଷିତ ହୁଅନ୍ତି,ମାଛର ଶବ୍ଦ ମଧ୍ୟ ବିଲେଇମାନଙ୍କୁ ଆକୃଷ୍ଟ କରିଥାଏ ।
•ବିଲେଇ,ବାଘ,ଚିତା,ସିଂହ ଆଦି Felidae ଜୀଵକୁଳରେ ଵର୍ଗୀକୃତ ଏଵଂ ସର୍ଵପ୍ରଥମ Felidae ଜାତୀୟ ଜୀଵ ଆଜକୁ ୨୫ ମିଲିୟନ ଵର୍ଷ ପୂର୍ଵେ Oligocene ସମୟକାଳରେ ସୃଷ୍ଟି ହୋଇଥିଲା
•ମାଛମାନେ ସ୍ଥଳଭାଗରୁ ଜଳଭାଗକୁ ଆସିନାହାନ୍ତି ତେବେ ଡଲଫିନ୍ ଓ ତିମିଙ୍କ ପୂର୍ଵଜ Indocetusମାନେ ଆଜକୁ ପ୍ରାୟ ୪୫ ମିଲିୟନ ଵର୍ଷ ପୂର୍ଵେ ସ୍ଥଳଭାଗରୁ ଜଳଭାଗକୁ ଚାଲି ଯାଇ ଆଜି ମାଛ ଭଳି ଦେଖାଯାଉଛନ୍ତି ।
•ଚିତ୍ରରେ Felis ଵଂଶର ଜୀଵ । ୟୁରୋପ,ଆଫ୍ରିକା ଓ ଏସିଆର ଭୂଭାଗ Felis ଜାତୀୟ ଜୀଵଙ୍କର ସ୍ଥାନୀୟ ଭୂଭାଗ । ଏହି Felis ବଂଶଟି ୬ ରୁ ୭ ମିଲିୟନ ଵର୍ଷ ପୂର୍ଵେ ସୃଷ୍ଟି ହୋଇଥିଲା । ବିଲେଇମାନେ ପ୍ରାୟ ଦଶରୁ ସାତ ହଜାର ଵର୍ଷ ତଳେ ମାନଵମାନଙ୍କ ସହିତ ରହିଵାକୁ ଲାଗିଲେ । ଗୃହପାଳିତ ବିଲେଇଙ୍କର ଵୈଜ୍ଞାନିକ ନାମ Felis catus ଅଟେ ।
•ଏହା ନାଇଜେରିଆର ମାଛ ଓ ଚିତାବାଘକୁ ନେଇ ପ୍ରଚଳିତ ଏକ ଲୋକକଥା।
••••••••••••••••••••••••
No comments:
Post a Comment