ବସି କୁସୁମକୁ ପ୍ରଶଂସିଲେ ହେଲେ
ବାସିବ କି ମନୋହର
ଘାସିଟାକୁ ସମୁଚିତ କି ଭୂଦେଵ
ଆଶିର୍ବାଦ ଆଡ଼ମ୍ଵର
ସରସେ,କୁହାଯାଉଥାଏ ସିନା
ତୁହାଇ ତୁହାଇ ପୁଟ ଦେଲେ ହେଲେ
ଲୁହା କି ହୋଇବ ସୁନା ? ।୧।
ପାମର-ପାଣିଶିମ୍ଭୂଳୀ କି ହେବ
ତାସରସ ଫୁଲ-ଵଲ୍ଲୀ
ଗ୍ରାମ ଶୂକରୀକି ବଢା଼ଉ ଯେ ଥିଲି
କାମଧେନୁ ହୁଅ ବୋଲି
ସରସେ,କୁହାଯାଉଥାଏ ସିନା
ତୁହାଇ ତୁହାଇ ପୁଟ ଦେଲେ ହେଲେ
ଲୁହା କି ହୋଇବ ସୁନା ? ।୨।
କୁଆ ପଞ୍ଜୁରୀରେ ପଡି଼ଲେ କି ଧରେ
ଶୁଆ ପରି ହରିନାମ
ଭୁଆଟା ଗୁହାରେ ପଶିଲେ କି କରେ
ଛୁଆ ସିଂହ ପରାକ୍ରମ
ସରସେ, କୁହାଯାଉଥାଏ ସିନା
ତୁହାଇ ତୁହାଇ ପୁଟ ଦେଲେ ହେଲେ
ଲୁହା କି ସୁନା ହୋଇବ ? ।୩।
କବିସୂର୍ଯ୍ୟ ଵଳଦେଵ ରଥ
No comments:
Post a Comment