କଵି ବୋଲେ—ମୋ ଚନ୍ଦ୍ରମା ଶୀତଳ କିରଣ ।
ଜ୍ଯୋତିର୍ଵିଦ— ଚନ୍ଦ୍ରେ ଜ୍ୟୋତି ଦିଏ ତ ତପନ ।
କଵି ବୋଲେ—ନାରୀ ମୁଖ ଉପମାର ସ୍ଥଳ ।
ଜ୍ଯୋତିର୍ଵିଦ—ଶୁଷ୍କ ଭୂମି ନୀରସ କେଵଳ ।
କଵି ବୋଲେ—ଜହ୍ନମାମୁଁ,ମୋ ମାତା କମଳା ।
ଜ୍ଯୋତିର୍ଵିଦ—ମାମୁଁର କି ହ୍ରାସ ବୃଦ୍ଧି କଳା ?
କଵି ବୋଲେ—ମୋ ଚନ୍ଦ୍ରମା ଶଶାଙ୍କ—ଲାଞ୍ଛିତ ।
ଜ୍ଯୋତିର୍ଵିଦ—ଚନ୍ଦ୍ରଟା ତ ପର୍ଵତ ଵେଷ୍ଟିତ ।
କଵି ବୋଲେ—ମୋ ଚନ୍ଦ୍ରମା ସୁଧା ସିନ୍ଧୁ ଜାତ ।
ଜ୍ଯୋତିର୍ଵିଦ—ଚନ୍ଦ୍ରଟା ତ ଉପଗ୍ରହ ମାତ୍ର ।
କଵି ବୋଲେ—ଚନ୍ଦ୍ରେ ପିତୃଲୋକର ଵସତି ।
ଜ୍ଯୋତିର୍ଵିଦ—ଜଳଵାୟୁ ନାହିଁ ଏକ ରତି ।
କଵି ବୋଲେ—ଚନ୍ଦ୍ର ରୂପ କେଡେ଼ ମନୋହର ।
ଜ୍ଯୋତିର୍ଵିଦ—ଚନ୍ଦ୍ରଟା ତ ଭୀଷଣ ବନ୍ଧୁର ।
କଵି ବୋଲେ—ଚନ୍ଦ୍ର ଗ୍ରାସ କରିଥାଏ ରାହୁ ।
ଜ୍ଯୋତିର୍ଵିଦ—ଗ୍ରହଣଟା ପୃଥ୍ଵୀଛାୟା ଆଉ ।
କଵି ବୋଲେ—ଚନ୍ଦ୍ର ଥାଏ ଶିଵ ମସ୍ତକରେ ।
ଜ୍ଯୋତିର୍ଵିଦ—ଚନ୍ଦ୍ର ଭ୍ରମୁଥାଏ ଆକାଶରେ ।
କଵି ବୋଲେ—ତାରାଗଣେ ଵିଭଵିଲେ ଇନ୍ଦୁ ।
ଜ୍ଯୋତିର୍ଵିଦ—ସେଟା ଜଡ଼ ଜ୍ଞାନ ନାହିଁ ଵିନ୍ଦୁ ।
କଵି ଜ୍ଯୋତିର୍ଵିଦ କଳି କରନ୍ତେ ଏମନ୍ତ ।
ଭାଙ୍ଗିଦେଲି କଳି ଦୁହିଁଙ୍କର କଥା ସତ୍ୟ ।।
©ଵ୍ଯାସକଵି ଫକୀରମୋହନ ସେନାପତି
No comments:
Post a Comment