ଆଜି ଏହି ଶୁଭଦିନେ
ଶୁଭ ସମାଚାର,
ଅନାବିଳ, ସ୍ବାର୍ଥ ଶୂନ୍ୟ,
ସୁପବିତ୍ର, ସ୍ନେହପୂର୍ଣ୍ଣ,
ଭଗିନୀର ନିମନ୍ତ୍ରଣ ଭାତୃ ଦ୍ବିତୀୟାର ।।
ଭୂଲି ବିଘ୍ନ,ଭୂଲି ବାଧା,
ସୁବିମଳ ସ୍ନେହ-ସୁଧା,
ଭ୍ରାତାଙ୍କୂ ଭଗିନୀ ଆଜି କରିବେ ଅର୍ପଣ,
ଭଗିନୀର ଏ ସମ୍ମାନ ,
ବିଶ୍ବବିଧାତାଙ୍କ ଦାନ,
ଭ୍ରାତାର ମଙ୍ଗଳ ଲାଗି ଭଗିନୀ ଜୀବନ ।।
ଜଗତେ ଯାହାଙ୍କ ନାମ,
ପ୍ରେମସିନ୍ଧୁ ଶାନ୍ତିଧାମ,
ଯାହାଙ୍କ ସୌନ୍ଦର୍ଯ୍ୟ ପ୍ରେମେ ପୂର୍ଣ୍ଣ ବିଶ୍ବଧାମ
ମଧୁର ମିଳନ ପୂର୍ଣ୍ଣ
ଯାହାଙ୍କର ଏ ଭୁବନ
ତାଙ୍କରି କରୁଣାବଳେ ସ୍ମରି ସେହି ନାମ,
ମଧୁର ସୁନ୍ଦର ଅତି,
ହୃଦୟ-ପବିତ୍ର-ପ୍ରୀତି,
ସାଦରେ ଅର୍ପୁଛି ଭାଇ ! କର ହେ ଗ୍ରହଣ;
ଭାଇ ଭଗ୍ନୀ ପ୍ରାଣେ ପ୍ରାଣେ,
ମିଳି ମିଶି ଏକ ସନେ,
ସୁଦୃଢ କରିବୁ଼ଁ ଆଜି ପ୍ରାଣର ବନ୍ଧନ ।
ସସ୍ନେହେ ସାଦରେ ଭଗ୍ନୀ,
ଭ୍ରାତାଙ୍କ ମଙ୍ଗଳ ଗଣି,
ଅର୍ପିବେ ମିଷ୍ଟାନ୍ନ ମୁଖେ,
ଲଲାଟେ ଚନ୍ଦନ,
ସୁନ୍ଦର ପବିତ୍ର ପ୍ରୀତି,
ସୁମଧୁର ସ୍ନେହ ସ୍ମୃତି
ଯେ ମହାନ ସ୍ନେହ ମନ୍ତ୍ରେ “ଶମନ ଦମନ” ।
ଅନ୍ୟର ନାହିଁ ଏ ଶକ୍ତି,
ଅପାର୍ଥିବ ଅନୁରକ୍ତି,
ଭ୍ରାତା ଭିନ୍ନ କେ ଘେନିବ ଭଗ୍ନୀ-ସ୍ନେହ-ଦାନ ?
ଭ୍ରାତାଙ୍କ ମହୋଚ୍ଚ ପ୍ରାଣ
ଭଗିନୀର କ୍ଷୁଦ୍ର ଦାନ
ଘେନିବ କି ନାହିଁ ଆଜି ଭୂଲି ଆତ୍ମ-ଜ୍ଞାନ ।
ଭଗିନୀ ର କ୍ଷୁଦ୍ର ଶକ୍ତି,
ଭଗିନୀ ର ସ୍ନେହ ଭକ୍ତି,
ଯାରେ ଚିର ନିଶିଦିନ ଭ୍ରାତାଙ୍କ କଲ୍ୟାଣ;
ଜଗତର ନାରୀନର,
ସହୋଦରା ସହୋଦର,
ଜାଗୁଅଛି ପ୍ରାଣେ ଆଜି ଏହି ଦିବ୍ୟ ଜ୍ଞାନ ।
ଭଗିନୀ ର ଭ୍ରାତା ଆଜି,
ଚନ୍ଦନ କୁସୁମେ ସାଜି,
ନବବର୍ଷେ ନବପ୍ରୀତି କରନ୍ତୁ ଗ୍ରହଣ,
ବିଶ୍ବମା'ର ଆଶିର୍ବାଦେ,
ଶୁଭଦିନେ ନିର୍ବିବାଦେ,
ସ୍ନେହ ର ଚନ୍ଦନ ବିନ୍ଦୁ ,
ପ୍ରୀତିର ମିଷ୍ଟାନ୍ନ,
ସ୍ମୃତି-ଥାଳୀ ପୂର୍ଣ୍ଣ କରି,
ବିନୟର ହସ୍ତେ ଧରି,
ଦେବି ଗୋ ମୁଁ କିଏ ନେବ ଆସ ଇଛା ଯାର,
ଭଗିନୀ ର ନିମନ୍ତ୍ରଣ----- ଭାତୃଦ୍ବିତୀୟାର ।
କବି@ଶ୍ରୀମତି ରେବା ରାୟ
ବି:ଦ୍ର:- ଆଗେ ପୂର୍ବ ଭାରତରେ ଭାତୃଦ୍ବିତୀୟା ଅତି ଉତ୍ସାହ ସହକାରେ ପାଳିତ ହେଉଥିଲା !
ପଶ୍ଚିମ ଭାରତର ରାକ୍ଷୀ ପର୍ବର ଆଗମନ ପରେ ଏ ପର୍ବର ଲୋକପ୍ରିୟତା ଅନେକାଂଶରେ ହ୍ରାସ ପାଇଛି !!!!
କାର୍ତ୍ତିକ ଶୁକ୍ଳ ଦ୍ୱିତୀୟା ତିଥିରେ ଭାତୃ ଦ୍ବିତୀୟା ପର୍ବ ପାଳିତ ହେଉଥିଲା ।
ଆଜିକାଲି ଆମ ଅଞ୍ଚଳରେ ଏ ଦିନ ପୂର୍ବରୁ
ଭଉଣୀ ଘରକୁ କେବଳ ଭାର ପଠାଇଦିଆଯାଏ ।
No comments:
Post a Comment